نیارادا رایج اولان اوشاق فولکوریندان بیر نمونه
خالقیمیزین شفاهی ادبیاتینین مهم بیر حیصه سیده اوشاق ادبیاتیدیر .اوشاق ادبیاتی چوخ گوجلی و قول قانادلی اولسادا تاسفلر اولسون کی اولدوغو کیمی اهمیت وئریلمه ییب دیر.
بعضا منه بو سوال قاباغا گلیر کی نئجه اولدو بیزیم بو ناغیل لاریمیز،شعرلریمیز؟،...
اوستاد شهریارین گوزل بیر مصراع سی وار کی دئییر:کئشدی گئتدی ایتدی باتدی داغیلدی.دوغورداندا بئله دیر...ایتدی باتدی داغیلدی
آی تئشتی تئشتی تئشتی،ووردوم گیلانی کئشدی...
الیمی پیچاق کسیبدی دسته پیچاق کسیبدی....
اوشودوم آی اوشودوم داغدان آلما داشیدیم.....
هی ی ی ی.......یادش بخیر
تخمینا ۳۰ ایل بوندان قاباق قیش گئجه لرینین بیرینده(بایرام آییندا) اوستونه نیمداشت بیر پالاز اورتولموش کورسو تویوندا بیر قوجا ننه دن ائشیتدیگیم بیر حکمتلی ناغیلی قوللوغونوزا چاتدیرماق ایستردیم.
بیر قاری ننه قیش فصلینده دانانی طوله دن چیخاردیب سووارماق اوچون کندین بولاغینا آپاریر یولدا قارینین آیاغی سوروشوب ییخیلیر.او بوزا اوز دوتوب دئییر:
آی بوز سن نه گوجلوسن؟
بوز:گوجلو اولسایدیم منی گون اریتمزدی
آی گون سن نه گوجلوسن؟
گون:گوجلو اولسایدیم یوزومو بولود آلمازدی
آی بولود سن نه گوجلوسن؟
بولود:گوجلو اولسایدیم مندن یاغیش یاغمازدی
آی یاغیش سن نه گوجلوسن؟
یاغیش:گوجلو اولسایدیم اوت مندن بیتمزدی
آی اوت سن نه گوجلوسن؟
اوت:گوجلو اولسایدیم قویون منی یئمزدی
آی قویون سن نه گوجلوسن؟
گوجلو اولسایدیم چوبان منی کسمزدی
آی چوبان سن نه گوجلوسن؟
گوجلو اولسایدیم سیچان چوره ییمی یئمزدی
آی سیچان سن نه گوجلوسن؟
سیچان:گوجلو اولسایدیم پیشیک منی یئمزدی
آی پیشیک سن نه گوجلوسن
پیشیک:گوجلویم آی گوجلویم
دمیر داراق دیشلییم
تندیر اوستو قیشلاغیم
یوکون اوستو یایلاغیم
قادین هر نه پیشیرسه
اودا منیم بوغ یاغیم