شمینین تویو

 

شمی نئچه گون تویدان قاباق باغرو داغلاری اتکلریندن گیلان ماحالینا ساری گئدیر کی توی دوگوسون آلیب گتیرسین.قاییداندا اسبینه داغی اطرافیندا برک قار کولکه دوشور، داها یولونو داواملاندیرا بیلمیر.نهایت یولون قیراغینا ییخیلیب سرنوشتینی گوزلمکده اولور...

نیارا اهالیسی خصوصیله عایله عضولری ،شمینین یوبانماسیندان چوخ نیگران اولورلار.قونوم قونشولار، اقرابالار قارداشیلا بیرگه شمی نین دالیسیجا گئدمیه حاضیرلانیرلار قالین پال پالتار گئییب،اله آغاج آلیب، اسبینه طرفه یولا دوشورلر.قارا سودان کئچیب سورعتله اوزلرینی اسبینه داغینا چاتدیریرلار،هره بیر طرفده شمینی سسله ییر

آی شمی ،آی شمی...

آنجاق شمیدن هارای اولمور.نهایت شمینی یول قیراغیندا ییخیلمیش حالدا گورورلر.قارداشی شمینی دیزی اوسته آلیر و دانیشدیرماق ایسته ییر ...

شمی دین دانیش سنه نه اولوب؟

جاواب اولماییر. قارداش چوخ نیگران اولوب بی اختیار گوز یاشلاری اله نیر .یولداشلارین اورک وئرمه سی قارداشا تاثیر ائله میر...

نهایت گئدنلرین بیری قاطیرا مینیب شمینی ده قوجاغینا آلیر کنده دوغرو یولا دوشورلر. آبان آیی اولدوغونا باخمایاراق قار آسماندان ائله اله نیردی سانکی قیشین اورتا آییدیر.

جیغیر یول، نه بیر کاروان گوزه ده ییر نه ده کی بیر سس ائشیدیلیر قوو وورورسان قولاق دوتولور. بیر آز یول گلندن سونرا جاناوارلارین اولاشماسی، اوره کلرده داها آرتیق نیگرانلیق یارادیر.بو نیگرانلیغی هئچ کس اوزه گتیرمیر، و بیر بیرلرینه بئله سوزلرله اورک وئرمک ایسته ییرلر:

قیرواق گلین، کنده آز قالیریق آی...هر حالدا خصوصیله بئله بیر حالدا آللاها توکل ائتمکدن باشقا بیر شئی نظره گلرمی؟

هر بیر آددیما بیر قدم کنده یاخینلاشسالاردا قاطیرین اوسته اوتوران شمینین یاری یولدا جانی چیخماسینی یاواش یاواش حیس ائدیردی.

بیر حالدا کی قونوم قونشولار و ائل طایفا توی اوچون شمی گیله گلمیشدیلر.گئجه نین یاریسی شمینین اولومو ایله اوز به اوز اولورلار.هئچ کس اینانا بیلمیردی بو آجی حادیثه نی .آخی چوخ آغیر و نیسگیللی بیر حادیثه ایدی.شمینی قاطیردان اندیرن حالدا وای شوون سسی کندی بورودو،توی لوویا دوندو، ایلاهی بو نه موصیبت!بو نه تقدیر!

هر حالدا تقدیر بئله یمیش سرنوشتدن قاچماق اولماز.حقیقتی باور ائتمه لی ییک آجی اولسادا.

شمی نین جانسیز پیکری گئجه نی ائوده قالیر و سحر تئزده کند اهالیسی طرفدن آغیر حزن ایله کندین قبیرساندیقیندا تورپاغا تاپشیریلیر. 

شمینین قارداشلاری باجیلاری و خصوصیله آناسی عومرونون سونونا دک بو آغیر موصیبته آغلاییب گوز یاشی توکورلر. او جوره کی قونشولار شمینین آناسینین نیسگیللی اوخشامالارین هله ده یاددان چیخارمایبلار:

گوللریم دن دن اولدو

درمدیم دن دن اولدو

من سندن آیریلمازدیم

آی اوغول

آیریلیق سندن اولدو

توی گورمه ین بالام لای لای...

او هر جمعه آخشامی اوغلونون مزاری اوسته گئدیب بئله درد دیل ائدرمیش:

گلمیشم گورم سنی

گول کیمی درم سنی

 قاپون یوخ پنجرن یوخ

هایاندان گورم سنی...